শিশুৰ প্ৰতিপালন আৰু স্বভাৱ:
(ইন্টাৰনেটৰ পৰা সংগ্ৰহ কৰা কথাৰ আধাৰত)
শিশু এটি কেনেদৰে , কেনে পৰিবেশত ডাঙৰ হয়, তাৰ ওপৰত শিশুটিৰ চৰিত্ৰ, মনোবৃত্তি
আদি গঢ় লৈ উঠে৷ এই কথাত নিশ্চয় কোনো সন্দেহ নাই৷ পৰিৱেশে শিশুটিৰ মানসিকতাত প্ৰভাৱ
পেলাবই, ইতিবাচক নহ’লে নেতিবাচক৷ ডাঙৰ হোৱাৰ পাছত সেই মানসিকতা সলনি কৰা একেবাৰে অসম্ভৱ
নহয় যদিও সেইটো কঠিন কাম৷
যদি কোনো শিশু সদায় আনৰ সমালোচনা শুনি শুনি ডাঙৰ হয়, তেনে শিশুৱেও আনক সদায়
দোষাৰোপ কৰিবলৈ, বেয়া বুলি ভাবিবলৈকে শিকে৷ তেনে শিশুৱে অতি সহজে আনক বেয়া বুলি ঠাৱৰ
কৰি লয়৷ আনহাতে হিংসাৰ মাজত ডাঙৰ হোৱা শিশুৱে স্বাভাৱিকতে কাজিয়া কৰিবলৈ শিকে৷ ভয়ৰ
পৰিবেশত ডাঙৰ হোৱা শিশুৱে সদায় অজান আশংকাৰ বলি হয়৷ কিবা এটা ঘটিব, কিবা দুৰ্ঘটনা হ’ব,
কিবা অপায়-অমঙ্গল ঘটিব আদি অহেতুক দুশ্চিন্তাত ভুগে৷ পুতৌৰ মাজত ডাঙৰ হোৱা শিশুৱে নিজকে
পুতৌ কৰিবলৈ শিকে৷ তেনে শিশু সদায় ভিতৰি-ভিতৰি দুখী হয় আৰু আনৰ পৰা পুতৌ আশা কৰি থাকে
ডাঙৰ হোৱাৰ পাছতো৷ আনৰ ঠাট্টা-মস্কৰা শুনি ডাঙৰ হ’লে শিশু লাজকুৰীয়া হয়৷ তেনে শিশু
আত্ম-সচেতন হয়৷ কোনোবাই হাঁহিছে নেকি , কোনোবাই চাই আছে নেকি ইত্যাদি কথাকে বেছিকৈ
ভাবে৷ যদিহে কোনো শিশু আনৰ ঈৰ্ষাৰ মাজত ডাঙৰ হয় তেনে শিশুৱে আনক হিংসা কৰিবলৈ শিকে৷
লাজ-অপমানৰ মাজত ডাঙৰ হ’লে শিশু দোষী ভাবৰ স্বীকাৰ হয়৷ দোষ নাথাকিলেও নিজক দোষী-দোষী
জ্ঞান কৰে৷
আনহাতে,
যদিহে কোনো শিশুৱে উদগণি লাভ কৰি কৰি ডাঙৰ হয়, তেনে শিশুৱে আত্মবিশ্বাস শিকে৷
কথা-বতৰা, চলন-ফুৰণ আদিত সেই আত্ম-বিশ্বাস প্ৰকাশ পাই উঠে৷ যি শিশু সহনশীলতাৰ মাজত
ডাঙৰ হয়, তেনে শিশুৱে শিকে ধৈৰ্য৷ প্ৰশংসাৰ
মাজত ডাঙৰ হোৱা শিশুৱে আনকো প্ৰশংসা কৰিব পৰা হয়৷ মৰমেৰে গ্ৰহণ কৰা পৰিৱেশত ডাঙৰ হোৱা
শিশুৱে আনক ভাল পাব পৰা হয়৷ অনুমোদনৰ পৰিবেশত ডাঙৰ হোৱা শিশুৱে নিজকে ভাল পাব পৰা হয়৷
স্বীকৃতি লাভ কৰা পৰিবেশে শিশুক শিকায় যে কোনো লক্ষ্য থকাটো ভাল৷ কোনো কাম কৰিবলৈ চেষ্টা
কৰাটো ভাল৷ যদিহে আনৰ লগত ভগাই লোৱা বা আদান-প্ৰদানৰ পৰিবেশত ডাঙৰ হয়, তেনেহলে শিশুৱে
উদাৰ হ’বলৈ শিকে৷ সততাৰ মাজত ডাঙৰ হোৱা শিশুৱে শিকে সত্যবাদিতা ৷ ন্যয়শীলতাৰ পৰিবেশে
শিশুক শিকায় ন্যয়বান হ’বলৈ৷ কৰুণা আৰু সহানুভুতিৰ পৰিবেশত ডাঙৰ হ’লে শিশুৱে শিকে সন্মান
কৰিবলৈ৷ সুৰক্ষাৰ পৰিৱেশত ডাঙৰ হোৱা শিশুৱে নিজৰ ওপৰত আৰু নিজৰ আশে-পাশে থকা লোকৰ ওপৰত
ভাৰষা কৰিবলৈ শিকে৷
যদিহে বন্ধুত্বপূৰ্ণ পৰিবেশত কোনো শিশু ডাঙৰ হয়, সেই শিশুৱে শিকে এই পৃথিবীখন
থাকিবলৈ সুন্দৰ বুলি ভাবিবলৈ৷
সেয়েহে , পৃথিবীখন সুন্দৰ কৰাত পিতৃ-মাতৃসকলেই নিশ্চয় সকলোতকৈ গুৰুত্বপূৰ্ণ
ভূমিকা পালন কৰিব পাৰে৷
No comments:
Post a Comment